chalte hue ek roz Thahar jaenge hum bhi

chalte hue ik roz Thahar jā.eñge ham bhī

dariyā haiñ samundar meñ utar jā.eñge ham bhī

ab baiTh ke zaḳhmoñ se lahū poñchh rahā hai

pahle to vo samjhā thā ki Dar jā.eñge ham bhī

ye kyā ki har ilzām hamāre hī sar aa.e

ā.īna bano tum to sañvar jā.eñge ham bhī

toḌeñge nahīñ apne qabīle kī rivāyat

hañste hue maqtal se guzar jā.eñge ham bhī

bhātī hai hameñ bhī dar-o-dīvār kī ḳhushbū

kuchh ḳhvāb kamā leñge to ghar jā.eñge ham bhī

iḳhlās ke rishte ne hameñ bāñdh rakhā hai

dushman ye samajhtā thā bikhar jā.eñge ham bhī

sharminda huā ghar meñ vo kuchh der lagā kar

samjhā thā sadā de ke guzar jā.eñge ham bhī

chalte hue ek roz Thahar jaenge hum bhi

dariya hain samundar mein utar jaenge hum bhi

ab baiTh ke zaKHmon se lahu ponchh raha hai

pahle to wo samjha tha ki Dar jaenge hum bhi

ye kya ki har ilzam hamare hi sar aae

aaina bano tum to sanwar jaenge hum bhi

toDenge nahin apne qabile ki riwayat

hanste hue maqtal se guzar jaenge hum bhi

bhati hai hamein bhi dar-o-diwar ki KHushbu

kuchh KHwab kama lenge to ghar jaenge hum bhi

iKHlas ke rishte ne hamein bandh rakha hai

dushman ye samajhta tha bikhar jaenge hum bhi

sharminda hua ghar mein wo kuchh der laga kar

samjha tha sada de ke guzar jaenge hum bhi