chaman hai maqtal-e-naghma ab aur kya kahiye

chaman hai maqtal-e-naġhma ab aur kyā kahiye

bas ik sukūt kā aalam jise navā kahiye

asīr-e-band-e-zamāna huuñ sāhabān-e-chaman

mirī taraf se guloñ ko bahut duā kahiye

yahī hai jī meñ ki vo rafta-e-taġhāful o naaz

kahīñ mile to vahī qissa-e-vafā kahiye

use bhī kyuuñ na phir apne dil-e-zabūñ kī tarah

ḳharāb-e-kākul o āvāra-e-adā kahiye

ye kū-e-yār ye zindāñ ye farsh-e-mai-ḳhāna

inheñ ham ahl-e-tamannā ke naqsh-e-pā kahiye

vo ek baat hai kahiye tulū-e-sub.h-e-nashāt

ki tābish-e-badan o shola-e-hinā kahiye

vo ek harf hai kahiye use hikāyat-e-zulf

ki shikva-e-rasan o bandish-e-balā kahiye

rahe na aañkh to kyuuñ dekhiye sitam kī taraf

kaTe zabān to kyuuñ harf-e-nā-ravā kahiye

pukāriye kaf-e-qātil ko ab muālij-e-dil

baḌhe jo nāḳhun-e-ḳhanjar girah-kushā kahiye

paḌe jo sañg to kahiye use nivāla-e-zar

lage jo zaḳhm badan par use qabā kahiye

fasāna jabr kā yāroñ kī tarah kyuuñ 'majrūh'

maza to jab hai ki jo kahiye barmalā kahiye

chaman hai maqtal-e-naghma ab aur kya kahiye

bas ek sukut ka aalam jise nawa kahiye

asir-e-band-e-zamana hun sahaban-e-chaman

meri taraf se gulon ko bahut dua kahiye

yahi hai ji mein ki wo rafta-e-taghaful o naz

kahin mile to wahi qissa-e-wafa kahiye

use bhi kyun na phir apne dil-e-zabun ki tarah

KHarab-e-kakul o aawara-e-ada kahiye

ye ku-e-yar ye zindan ye farsh-e-mai-KHana

inhen hum ahl-e-tamanna ke naqsh-e-pa kahiye

wo ek baat hai kahiye tulu-e-subh-e-nashat

ki tabish-e-badan o shola-e-hina kahiye

wo ek harf hai kahiye use hikayat-e-zulf

ki shikwa-e-rasan o bandish-e-bala kahiye

rahe na aankh to kyun dekhiye sitam ki taraf

kaTe zaban to kyun harf-e-na-rawa kahiye

pukariye kaf-e-qatil ko ab mualij-e-dil

baDhe jo naKHun-e-KHanjar girah-kusha kahiye

paDe jo sang to kahiye use niwala-e-zar

lage jo zaKHm badan par use qaba kahiye

fasana jabr ka yaron ki tarah kyun 'majruh'

maza to jab hai ki jo kahiye barmala kahiye