chaman mein dahr ke aa kar main kya nihaal hua

chaman meñ dahr ke aa kar maiñ kyā nihāl huā

ba-rañg-e-sabza-e-begāna pā.emāl huā

kahānī kah ke sulāte the yaar ko so ab

fasāna umr huī ḳhvāb vo ḳhayāl huā

junūñ kī chāk-zanī ne asar kiyā vaañ bhī

jo ḳhat meñ haal likhā thā vo ḳhat kā haal huā

'nasīm' duzdī-e-mazmūñ na chhoḌeñge sho.arā

agarche shahr kā tabdīl kotvāl huā

chaman mein dahr ke aa kar main kya nihaal hua

ba-rang-e-sabza-e-begana paemal hua

kahani kah ke sulate the yar ko so ab

fasana umr hui KHwab wo KHayal hua

junun ki chaak-zani ne asar kiya wan bhi

jo KHat mein haal likha tha wo KHat ka haal hua

'nasim' duzdi-e-mazmun na chhoDenge shoara

agarche shahr ka tabdil kotwal hua