chaman mein dahr ke har gul hai kan ki surat

chaman meñ dahr ke har gul hai kaan kī sūrat

har ek ġhuncha hai us meñ zabān kī sūrat

nahīñ hai shikva agar vo nazar nahīñ aatā

kisū ne dekhī nahīñ apnī jaan kī sūrat

kaheñ to sab haiñ jahāñ ko rabāt-e-kohna vale

hamesha hai gī na.ī is makān kī sūrat

jo dekhtā hai so pahchāntā nahīñ, aisī

badal ga.ī hai dil-e-nā-tavān kī sūrat

jo niklī baize se bulbul to huī asīr-e-qafas

na dekhī khol ke aañkh āshiyān kī sūrat

agar hazār musavvir ḳhayāl dil meñ kareñ

kabhū na khīñch sakeñ us kī aan kī sūrat

falak ke ḳhvān upar us kī tañg-chashmī se

kabhū nazar na paḌī mehmān kī sūrat

ghaḌī ghaḌī meñ badaltā hai rañg ai 'hātim'

hamesha bū-qalamūñ hai jahān kī sūrat

chaman mein dahr ke har gul hai kan ki surat

har ek ghuncha hai us mein zaban ki surat

nahin hai shikwa agar wo nazar nahin aata

kisu ne dekhi nahin apni jaan ki surat

kahen to sab hain jahan ko rabaat-e-kohna wale

hamesha hai gi nai is makan ki surat

jo dekhta hai so pahchanta nahin, aisi

badal gai hai dil-e-na-tawan ki surat

jo nikli baize se bulbul to hui asir-e-qafas

na dekhi khol ke aankh aashiyan ki surat

agar hazar musawwir KHayal dil mein karen

kabhu na khinch saken us ki aan ki surat

falak ke KHwan upar us ki tang-chashmi se

kabhu nazar na paDi mehman ki surat

ghaDi ghaDi mein badalta hai rang ai 'hatim'

hamesha bu-qalamun hai jahan ki surat