chaman mein gul ne jo kal dawa-e-jamal kiya

chaman meñ gul ne jo kal dāva-e-jamāl kiyā

jamāl-e-yār ne muñh us kā ḳhuub laal kiyā

falak ne aah tirī rah meñ ham ko paidā kar

ba-rañg-e-sabza-e-nūrasta pā.emāl kiyā

rahī thī dam kī kashākash gale meñ kuchh baaqī

so us kī teġh ne jhagḌā hī infisāl kiyā

mirī ab āñkheñ nahīñ khultīñ zo.af se hamdam

na kah ki niiñd meñ hai tū ye kyā ḳhayāl kiyā

bahār-e-rafta phir aa.ī tire tamāshe ko

chaman ko yumn-e-qadam ne tire nihāl kiyā

javāb-nāma siyāhī kā apnī hai vo zulf

kisū ne hashr ko ham se agar savāl kiyā

lagā na dil ko kahīñ kyā sunā nahīñ tū ne

jo kuchh ki 'mīr' kā is āshiqī ne haal kiyā

chaman mein gul ne jo kal dawa-e-jamal kiya

jamal-e-yar ne munh us ka KHub lal kiya

falak ne aah teri rah mein hum ko paida kar

ba-rang-e-sabza-e-nurasta paemal kiya

rahi thi dam ki kashakash gale mein kuchh baqi

so us ki tegh ne jhagDa hi infisal kiya

meri ab aankhen nahin khultin zoaf se hamdam

na kah ki nind mein hai tu ye kya KHayal kiya

bahaar-e-rafta phir aai tere tamashe ko

chaman ko yumn-e-qadam ne tere nihaal kiya

jawab-nama siyahi ka apni hai wo zulf

kisu ne hashr ko hum se agar sawal kiya

laga na dil ko kahin kya suna nahin tu ne

jo kuchh ki 'mir' ka is aashiqi ne haal kiya