چمن میں کوئی کلی جب بھی مسکراتی ہے

چمن میں کوئی کلی جب بھی مسکراتی ہے

مجھے کسی کے تبسم کی یاد آتی ہے

ہماری تیرہ شبی اس سحر سے کیا مانگے

جو دوسروں سے اجالوں کی بھیک پاتی ہے

چمن میں دیکھ کے پھولوں کی چاک دامانی

بہار اپنے لہو میں نہائے جاتی ہے

گواہ ہیں یہ شب غم کے ڈوبتے تارے

کسی کی یاد میں مشکل سے نیند آتی ہے

اسی بہار پر اترا رہے ہیں اہل چمن

نئے نئے جو گلستاں میں گل کھلاتی ہے

ہم ایسی ناؤ کے ہیں ناخدا مقدر سے

بھنور سے بچ کے جو ساحل پہ ڈوب جاتی ہے

فریب دینے گلستاں کے ذمہ داروں کو

لباس وقت بدل کے بہار آتی ہے

سحر کو ہوگی یہ محفل نہ دور جام و سبو

کمالؔ ہوش میں آؤ کہ رات جاتی ہے