chaman mein subh ye kahti thi ho kar chashm-e-tar shabnam

chaman meñ sub.h ye kahtī thī ho kar chashm-e-tar shabnam

bahār-e-bāġh go yuuñ hī rahī lekin kidhar shabnam

araq kī buuñd us kī zulf se ruḳhsār par Tapkī

ta.ajjub kī hai jāgah ye paḌī ḳhurshīd par shabnam

hameñ to baaġh tujh bin ḳhāna-e-mātam nazar aayā

idhar gul phāḌte the jaib rotī thī udhar shabnam

kare hai kuchh se kuchh tāsīr-e-sohbat saaf tabaoñ kī

huī ātish se gul kī baiThte rashk-e-sharar shabnam

bhalā Tuk sub.h hone do ise bhī dekh leveñge

kisī āshiq ke rone se nahīñ rakhtī ḳhabar shabnam

nahīñ asbāb kuchh lāzim subuksāroñ ke uThne ko

ga.ī uḌ dekhte apne baġhair-az-bāl-o-par shabnam

na paayā jo gayā is baaġh se hargiz surāġh us kā

na palTī phir sabā īdhar na phir aa.ī nazar shabnam

na samjhā 'dard' ham ne bhed yaañ kī shādī o ġham kā

sahar ḳhandāñ hai kyuuñ rotī hai kis ko yaad kar shabnam

chaman mein subh ye kahti thi ho kar chashm-e-tar shabnam

bahaar-e-bagh go yun hi rahi lekin kidhar shabnam

araq ki bund us ki zulf se ruKHsar par Tapki

tajjub ki hai jagah ye paDi KHurshid par shabnam

hamein to bagh tujh bin KHana-e-matam nazar aaya

idhar gul phaDte the jaib roti thi udhar shabnam

kare hai kuchh se kuchh tasir-e-sohbat saf tabaon ki

hui aatish se gul ki baiThte rashk-e-sharar shabnam

bhala Tuk subh hone do ise bhi dekh lewenge

kisi aashiq ke rone se nahin rakhti KHabar shabnam

nahin asbab kuchh lazim subuksaron ke uThne ko

gai uD dekhte apne baghair-az-baal-o-par shabnam

na paya jo gaya is bagh se hargiz suragh us ka

na palTi phir saba idhar na phir aai nazar shabnam

na samjha 'dard' hum ne bhed yan ki shadi o gham ka

sahar KHandan hai kyun roti hai kis ko yaad kar shabnam