chaman pe apne bhi aaj rang-e-bahaar hota to id hoti

chaman pe apne bhī aaj rañg-e-bahār hotā to 'iid hotī

guloñ pe thoḌā hameñ bhī gar iḳhtiyār hotā to 'iid hotī

nisār-e-jāñ husn par koī jāñ-nisār hotā to 'iid hotī

ġhazāl āñkhoñ meñ halkā halkā ḳhumār hotā to 'iid hotī

ḳhushī meñ lipTe hue haiñ mātam huī hai ab 'iid bhī moharram

taḌap rahe haiñ hazār-hā ġham qarār hotā to 'iid hotī

ye kisht-e-be-āb qatre qatre ko dekh kab se taras rahī hai

zamīn-e-dil par falak zarā ashk-bār hotā to 'iid hotī

na yuuñ sisaktīñ chaman meñ kaliyāñ na yuuñ dahaktīñ vatan meñ galiyāñ

hamāre kahne meñ shahr aur shahryār hotā to 'iid hotī

ravish-ravish ātish-e-havādis qadam-qadam maut pal rahī hai

chaman kā mausam na itnā nā-ḳhushgavār hotā to 'iid hotī

guloñ pe taaza lahu ke chhīñTe diloñ kī dhaḌkan baḌhā rahe haiñ

jo tere vā'de pe bāġhbāñ e'tibār hotā to 'iid hotī

agar na hijrat kā karb hotā to ham bhī apnoñ meñ chahchahāte

vatan meñ bazmī tirā ġharīb-ud-dayār hotā to 'iid hotī

chaman pe apne bhi aaj rang-e-bahaar hota to 'id hoti

gulon pe thoDa hamein bhi gar iKHtiyar hota to 'id hoti

nisar-e-jaan husn par koi jaan-nisar hota to 'id hoti

ghazal aankhon mein halka halka KHumar hota to 'id hoti

KHushi mein lipTe hue hain matam hui hai ab 'id bhi moharram

taDap rahe hain hazar-ha gham qarar hota to 'id hoti

ye kisht-e-be-ab qatre qatre ko dekh kab se taras rahi hai

zamin-e-dil par falak zara ashk-bar hota to 'id hoti

na yun sisaktin chaman mein kaliyan na yun dahaktin watan mein galiyan

hamare kahne mein shahr aur shahryar hota to 'id hoti

rawish-rawish aatish-e-hawadis qadam-qadam maut pal rahi hai

chaman ka mausam na itna na-KHushgawar hota to 'id hoti

gulon pe taza lahu ke chhinTe dilon ki dhaDkan baDha rahe hain

jo tere wa'de pe baghban e'tibar hota to 'id hoti

agar na hijrat ka karb hota to hum bhi apnon mein chahchahate

watan mein bazmi tera gharib-ud-dayar hota to 'id hoti