chaman saja na sake gul hi kuchh khila to chale

chaman sajā na sake gul hī kuchh khilā to chale

hamāre baa'd bahāroñ kā silsila to chale

gila nahīñ ki hameñ jām-e-mai milā na milā

tujhe ham apnā lahū zindagī pilā to chale

koī to ḳhāk-basar Dhā.egā ye qasr-e-sitam

jafā-o-jaur kī buniyād ham hilā to chale

mujhe yaqīñ hai na.ī sub.h jald aa.egī

sitāra-hā-e-shab-e-yās jhilmilā to chale

jo be-zabāñ the unheñ baḳhsh dī hai goyā.ī

bujhe diloñ ko nayā hausla dilā to chale

siyāh-baḳhtoñ ko ham ne payām-e-sub.h diyā

ġhurūr-e-tīra-shabī ḳhaak meñ milā to chale

ḳhamosh rahne se hotī hai zulm kī tā.īd

nahīñ kuchh aur to zulmat kā hī gila to chale

chaman saja na sake gul hi kuchh khila to chale

hamare ba'd bahaaron ka silsila to chale

gila nahin ki hamein jam-e-mai mila na mila

tujhe hum apna lahu zindagi pila to chale

koi to KHak-basar Dhaega ye qasr-e-sitam

jafa-o-jaur ki buniyaad hum hila to chale

mujhe yaqin hai nai subh jald aaegi

sitara-ha-e-shab-e-yas jhilmila to chale

jo be-zaban the unhen baKHsh di hai goyai

bujhe dilon ko naya hausla dila to chale

siyah-baKHton ko hum ne payam-e-subh diya

ghurur-e-tira-shabi KHak mein mila to chale

KHamosh rahne se hoti hai zulm ki taid

nahin kuchh aur to zulmat ka hi gila to chale