chand fiqre zer-e-lab taDpa kiye

chand fiqre zer-e-lab taḌpā kiye

vo hameñ aur ham unheñ dekhā kiye

ġham thā apnī bad-nasībī kā unheñ

der tak kuchh lafz kal royā kiye

mere qadmoñ meñ rahī manzil mirī

rāste sūrat mirī dekhā kiye

ġham bhī ik ne.amat hai lekin dosto

ham use paayā kiye khoyā kiye

mujh se mil kar kal mire ahbāb bhī

der tak kyā jaane kyā sochā kiye

jis se rahtī thī munavvar ye zamīñ

āsmāñ vo chāñd taare kyā kiye

āsmānoñ kī taraf chal dī zamīñ

ham añdhere ġhaar meñ soyā kiye

mil na paayā zindagī kā kuchh surāġh

muddateñ guzrīñ hameñ pīchhā kiye

chal diyā ik aur patta TuuT kar

āñdhiyoñ ke dosh par takiya kiye

koī bhī dhartī na raas aa.ī hameñ

ham ḳhalāoñ meñ 'zafar' dekhā kiye

chand fiqre zer-e-lab taDpa kiye

wo hamein aur hum unhen dekha kiye

gham tha apni bad-nasibi ka unhen

der tak kuchh lafz kal roya kiye

mere qadmon mein rahi manzil meri

raste surat meri dekha kiye

gham bhi ek neamat hai lekin dosto

hum use paya kiye khoya kiye

mujh se mil kar kal mere ahbab bhi

der tak kya jaane kya socha kiye

jis se rahti thi munawwar ye zamin

aasman wo chand tare kya kiye

aasmanon ki taraf chal di zamin

hum andhere ghaar mein soya kiye

mil na paya zindagi ka kuchh suragh

muddaten guzrin hamein pichha kiye

chal diya ek aur patta TuT kar

aandhiyon ke dosh par takiya kiye

koi bhi dharti na ras aai hamein

hum KHalaon mein 'zafar' dekha kiye