چند لمحے تھے جو فریاد کے رکھے ہوئے ہیں

چند لمحے تھے جو فریاد کے رکھے ہوئے ہیں

چارہ گر نقش تری یاد کے رکھے ہوئے ہیں

یہ جو میں ٹوٹتا رہتا ہوں ترے ہوتے ہوئے

یہ ستم بھی تری بنیاد کے رکھے ہوئے ہیں

تو نے کیا سوچ کے محفل سے اٹھایا ہے ہمیں

مہرباں ہم تو ترے بعد کے رکھے ہوئے ہیں

گرد ہر سو ہے میں پہچان نہیں سکتا انہیں

کتنے موسم ابھی افتاد کے رکھے ہوئے ہیں

تجھ کو چھونے کی خطا مجھ سے ہوئی تھی سرزد

ہاتھ اب تک مرے صیاد کے رکھے ہوئے ہیں

یہ تو سب تیری اذیت کا بھرم ہے شہزادؔ

ورنہ ہم لوگ تو برباد کے رکھے ہوئے ہیں