chand uljhi hui sanson ki ata hun kya hun

chand uljhī huī sāñsoñ kī atā huuñ kyā huuñ

maiñ charāġh-e-tah-e-dāmān-e-sabā huuñ kyā huuñ

har nafas hai mirā parvarda-e-āġhosh-e-balā

apne nā-karda gunāhoñ kī sazā huuñ kyā huuñ

mujh pe khultā hī nahīñ merā sitam-dīda vajūd

koī patthar huuñ ki gum-karda sadā huuñ kyā huuñ

dil meñ huuñ aur zabāñ par kabhī aatā bhī nahīñ

maiñ koī bholā huā harf-e-duā huuñ kyā huuñ

maiñ safar meñ huuñ magar samt-e-safar koī nahīñ

kyā maiñ ḳhud apnā hī naqsh-e-kaf-e-pā huuñ kyā huuñ

maiñ ne dekhā hī nahīñ jāgtī āñkhoñ se kabhī

koī uqda huuñ ki ḳhud uqda-kushā huuñ kyā huuñ

pūchhtā hai mirā pairāhan-e-hastī mujh se

maiñ qabā huuñ ki faqat band-e-qabā huuñ kyā huuñ

dil kī aur merī zabāñ ek hai phir bhī 'aḳhtar'

lafz o ma.anī kī pur-asrār fazā huuñ kyā huuñ

chand uljhi hui sanson ki ata hun kya hun

main charagh-e-tah-e-daman-e-saba hun kya hun

har nafas hai mera parwarda-e-aghosh-e-bala

apne na-karda gunahon ki saza hun kya hun

mujh pe khulta hi nahin mera sitam-dida wajud

koi patthar hun ki gum-karda sada hun kya hun

dil mein hun aur zaban par kabhi aata bhi nahin

main koi bhola hua harf-e-dua hun kya hun

main safar mein hun magar samt-e-safar koi nahin

kya main KHud apna hi naqsh-e-kaf-e-pa hun kya hun

main ne dekha hi nahin jagti aankhon se kabhi

koi uqda hun ki KHud uqda-kusha hun kya hun

puchhta hai mera pairahan-e-hasti mujh se

main qaba hun ki faqat band-e-qaba hun kya hun

dil ki aur meri zaban ek hai phir bhi 'aKHtar'

lafz o mani ki pur-asrar faza hun kya hun