charagh bas isi ummid par jala karega

charāġh bas isī ummīd par jalā karegā

ki vāpsī pe koī us se rābta karegā

tire liye vo koī rāsta nikālegā

vo sab se ruuTh bhī jaa.e tujhe milā karegā

duā salām mire aqrabā kī sunnat hai

tū muñh ko pher ke kaise mujhe ḳhafā karegā

qasam ḳhudā kī maiñ ḳhālī kamān laayā huuñ

ḳhabar nahīñ thī muḳhālif muqābla karegā

ye baat chhoḌ ki meñ bad zabāñ huuñ pāgal huuñ

ai ḳhush-gumān batā aa.ine kā kyā karegā

tū par lagā ke mujhe apnā shauq puurā kar

use to pūchh mujhe qaid se rihā karegā

alam thamā ke mujhe bhiiḌ meñ utarne de

faqīr laḌ ke ta.alluq kā haq adā karegā

usī majāz ko aate haiñ mo.ajize saare

vo shāḳh-e-ḳhushk ko ik lams se harā karegā

ye aadmī jo kisī qurb kī talāsh meñ hai

jahāñ vajūd milā baiTh kar ḳhatā karegā

charagh bas isi ummid par jala karega

ki wapsi pe koi us se rabta karega

tere liye wo koi rasta nikalega

wo sab se ruTh bhi jae tujhe mila karega

dua salam mere aqraba ki sunnat hai

tu munh ko pher ke kaise mujhe KHafa karega

qasam KHuda ki main KHali kaman laya hun

KHabar nahin thi muKHalif muqabla karega

ye baat chhoD ki mein bad zaban hun pagal hun

ai KHush-guman bata aaine ka kya karega

tu par laga ke mujhe apna shauq pura kar

use to puchh mujhe qaid se riha karega

alam thama ke mujhe bhiD mein utarne de

faqir laD ke talluq ka haq ada karega

usi majaz ko aate hain moajize sare

wo shaKH-e-KHushk ko ek lams se hara karega

ye aadmi jo kisi qurb ki talash mein hai

jahan wajud mila baiTh kar KHata karega