charagh-e-husn hai raushan kisi ka

charāġh-e-husn hai raushan kisī kā

hamārā ḳhuun hai roġhan kisī kā

abhī nādān haiñ mahshar ke fitne

raheñ thāme hue dāman kisī kā

dil aayā hai qayāmat hai mirā dil

uThe tāzīm de jauban kisī kā

ye mahshar aur ye mahshar ke fitne

kisī kī shoḳhiyāñ bachpan kisī kā

adā.eñ tā-abad bikhrī paḌī haiñ

azal meñ phaT paḌā jauban kisī kā

kiyā talvār ne ghuñghaT mire ba.ad

na muñh dekhegī ye dulhan kisī kā

hamārī ḳhaak mahshar tak uḌī hai

na haath aayā magar dāman kisī kā

bajā.e gul mirī turbat pe hoñ ḳhaar

ki uljhe gosha-e-dāman kisī kā

'bayāñ' barq-e-balā chitvan kisī kī

dil-e-pur-ārzū ḳhirman kisī kā

charagh-e-husn hai raushan kisi ka

hamara KHun hai roghan kisi ka

abhi nadan hain mahshar ke fitne

rahen thame hue daman kisi ka

dil aaya hai qayamat hai mera dil

uThe tazim de jauban kisi ka

ye mahshar aur ye mahshar ke fitne

kisi ki shoKHiyan bachpan kisi ka

adaen ta-abad bikhri paDi hain

azal mein phaT paDa jauban kisi ka

kiya talwar ne ghunghaT mere baad

na munh dekhegi ye dulhan kisi ka

hamari KHak mahshar tak uDi hai

na hath aaya magar daman kisi ka

bajae gul meri turbat pe hon KHar

ki uljhe gosha-e-daman kisi ka

'bayan' barq-e-bala chitwan kisi ki

dil-e-pur-arzu KHirman kisi ka