charagh-e-rah bujha kya ki rahnuma bhi gaya

charāġh-e-rāh bujhā kyā ki rahnumā bhī gayā

havā ke saath musāfir kā naqsh-e-pā bhī gayā

maiñ phuul chuntī rahī aur mujhe ḳhabar na huī

vo shaḳhs aa ke mire shahr se chalā bhī gayā

bahut aziiz sahī us ko merī dildārī

magar ye hai ki kabhī dil mirā dukhā bhī gayā

ab un darīchoñ pe gahre dabīz parde haiñ

vo tāñk-jhāñk kā ma.asūm silsila bhī gayā

sab aa.e merī ayādat ko vo bhī aayā thā

jo sab ga.e to mirā dard-āshnā bhī gayā

ye ġhurbateñ mirī āñkhoñ meñ kaisī utrī haiñ

ki ḳhvāb bhī mire ruḳhsat haiñ ratjagā bhī gayā

charagh-e-rah bujha kya ki rahnuma bhi gaya

hawa ke sath musafir ka naqsh-e-pa bhi gaya

main phul chunti rahi aur mujhe KHabar na hui

wo shaKHs aa ke mere shahr se chala bhi gaya

bahut aziz sahi us ko meri dildari

magar ye hai ki kabhi dil mera dukha bhi gaya

ab un darichon pe gahre dabiz parde hain

wo tank-jhank ka masum silsila bhi gaya

sab aae meri ayaadat ko wo bhi aaya tha

jo sab gae to mera dard-ashna bhi gaya

ye ghurbaten meri aankhon mein kaisi utri hain

ki KHwab bhi mere ruKHsat hain ratjaga bhi gaya