charKH ki sai-e-jafa koshish nakara hai

charḳh kī sa.ī-e-jafā koshish nākāra hai

gardish-e-dahr yahāñ jumbish-e-gahvāra hai

chāñd tāroñ ke talātum se ye aatā hai ḳhayāl

dil-e-vahshī koī tūfāñ-zada sayyāra hai

bah ga.e dīda-e-nam-nāk se dariyā lekin

dil vahī ek dahaktā huā añgāra hai

dil huā soz-e-jahannam meñ giraftār magar

ruuh ab bhī kisī firdaus meñ āvāra hai

kaisī taqdīr kī gardish ġham-e-dil ko maiñ ne

gardish-e-gumbad-e-aflāk pe de maarā hai

mere sheroñ se ta.arruz na kar ai nāqid-e-fan

merī barbādī-e-dil hī mirā shah-pārā hai

bahjat-e-fikr pe qādir huuñ maiñ jab tak 'aḳhtar'

mujhe sarmāya-e-andoh bahut pyārā hai

charKH ki sai-e-jafa koshish nakara hai

gardish-e-dahr yahan jumbish-e-gahwara hai

chand taron ke talatum se ye aata hai KHayal

dil-e-wahshi koi tufan-zada sayyara hai

bah gae dida-e-nam-nak se dariya lekin

dil wahi ek dahakta hua angara hai

dil hua soz-e-jahannam mein giraftar magar

ruh ab bhi kisi firdaus mein aawara hai

kaisi taqdir ki gardish gham-e-dil ko main ne

gardish-e-gumbad-e-aflak pe de mara hai

mere sheron se tarruz na kar ai naqid-e-fan

meri barbaadi-e-dil hi mera shah-para hai

bahjat-e-fikr pe qadir hun main jab tak 'aKHtar'

mujhe sarmaya-e-andoh bahut pyara hai