charKH se kuchh umid thi hi nahin

charḳh se kuchh umiid thī hī nahīñ

aarzū maiñ ne koī kī hī nahīñ

maz.habī bahas maiñ ne kī hī nahīñ

fāltū aql mujh meñ thī hī nahīñ

chāhtā thā bahut sī bātoñ ko

magar afsos ab vo jī hī nahīñ

jur.at-e-arz-e-hāl kyā hotī

nazar-e-lutf us ne kī hī nahīñ

is musībat meñ dil se kyā kahtā

koī aisī misāl thī hī nahīñ

aap kyā jāneñ qadr-e-yā-allāh

jab musībat koī paḌī hī nahīñ

shirk chhoḌā to sab ne chhoḌ diyā

merī koī society hī nahīñ

pūchhā 'akbar' hai aadmī kaisā

hañs ke bole vo aadmī hī nahīñ

charKH se kuchh umid thi hi nahin

aarzu main ne koi ki hi nahin

mazhabi bahas main ne ki hi nahin

faltu aql mujh mein thi hi nahin

chahta tha bahut si baaton ko

magar afsos ab wo ji hi nahin

jurat-e-arz-e-haal kya hoti

nazar-e-lutf us ne ki hi nahin

is musibat mein dil se kya kahta

koi aisi misal thi hi nahin

aap kya jaanen qadr-e-ya-allah

jab musibat koi paDi hi nahin

shirk chhoDa to sab ne chhoD diya

meri koi society hi nahin

puchha 'akbar' hai aadmi kaisa

hans ke bole wo aadmi hi nahin