chashm-e-hasin mein hai na ruKH-e-fitna-gar mein hai

chashm-e-hasīñ meñ hai na ruḳh-e-fitna-gar meñ hai

duniyā kā har fareb fareb-e-nazar meñ hai

ab kyā ḳhabar ki dil meñ hai kyā kyā jigar meñ hai

ab to tirī nazar kā tamāshā nazar meñ hai

īmān rakh ke kyā karūñ farsūda chiiz hai

mastī mujhe qubūl ki terī nazar meñ hai

nāsūr dard-e-zaḳhm tapish soz-o-iztirāb

sāmān sau tarah kā dil-e-muḳhtasar meñ hai

hāzir hai us ke vāste jis ko ho aarzū

haañ ik lahū kī buuñd mirī chashm-e-tar meñ hai

qismat se mil ga.ī hai ye bedārī-e-hayāt

is ishq ke nisār ki duniyā nazar meñ hai

mujh ko na din ko chain na shab ko sukūñ nasīb

ik rabt-e-dā.imī mirī shām-o-sahar meñ hai

hairat se dekhiye na mire sajda-hā-e-shauq

ye āstāñ kuchh aur hī merī nazar meñ hai

baaqī haiñ ba.ad-e-tauba bhī rindī ke valvale

dil meñ ḳhayāl-e-bāda hai sāġhar nazar meñ hai

achchhī milī hai mujh ko ye dīvāngī-e-shauq

duniyā kā har ḳhayāl dil-e-be-ḳhabar meñ hai

do qatra-hā-e-ḳhūñ sar-e-mizhgāñ haiñ muntazir

'bahzād' do-jahāñ kā tamāshā nazar meñ hai

chashm-e-hasin mein hai na ruKH-e-fitna-gar mein hai

duniya ka har fareb fareb-e-nazar mein hai

ab kya KHabar ki dil mein hai kya kya jigar mein hai

ab to teri nazar ka tamasha nazar mein hai

iman rakh ke kya karun farsuda chiz hai

masti mujhe qubul ki teri nazar mein hai

nasur dard-e-zaKHm tapish soz-o-iztirab

saman sau tarah ka dil-e-muKHtasar mein hai

hazir hai us ke waste jis ko ho aarzu

han ek lahu ki bund meri chashm-e-tar mein hai

qismat se mil gai hai ye bedari-e-hayat

is ishq ke nisar ki duniya nazar mein hai

mujh ko na din ko chain na shab ko sukun nasib

ek rabt-e-daimi meri sham-o-sahar mein hai

hairat se dekhiye na mere sajda-ha-e-shauq

ye aastan kuchh aur hi meri nazar mein hai

baqi hain baad-e-tauba bhi rindi ke walwale

dil mein KHayal-e-baada hai saghar nazar mein hai

achchhi mili hai mujh ko ye diwangi-e-shauq

duniya ka har KHayal dil-e-be-KHabar mein hai

do qatra-ha-e-KHun sar-e-mizhgan hain muntazir

'bahzad' do-jahan ka tamasha nazar mein hai