chashm-e-qatil hamein kyunkar na bhala yaad rahe

chashm-e-qātil hameñ kyūñkar na bhalā yaad rahe

maut insān ko lāzim hai sadā yaad rahe

merā ḳhuuñ hai tire kūche meñ bahā yaad rahe

ye bahā vo nahīñ jis kā na bahā yaad rahe

kushta-e-zulf ke marqad pe tū ai lailā-vash

bed-e-majnūñ hī lagā tā-ki patā yaad rahe

ḳhāksārī hai ajab vasf ki juuñ juuñ ho sivā

ho safā aur dil-e-ahl-e-safā yaad rahe

ho ye labbaik-e-haram yā ye azān-e-masjid

mai-kasho qulqul-e-mīnā kī sadā yaad rahe

yaad us vāda-farāmosh ne ġhairoñ se badī

yaad kuchh kam to na thī aur sivā yaad rahe

ḳhat bhī likhte haiñ to lete haiñ ḳhatā.ī kāġhaz

dekhiye kab tak unheñ merī ḳhatā yaad rahe

do varaq meñ kaf-e-hasrat ke do aalam kā hai ilm

sabaq-e-ishq agar tujh ko dilā yaad rahe

qatl-e-āshiq pe kamar bāñdhī hai ai dil us ne

par ḳhudā hai ki use naam mirā yaad rahe

tā.er-e-qibla-numā ban ke kahā dil ne mujhe

ki taḌap kar yuuñ hī mar jā.egā jā yaad rahe

jab ye dīñ-dār haiñ duniyā kī namāzeñ paḌhte

kaash us vaqt unheñ nām-e-ḳhudā yaad rahe

ham pe sau baar jafā ho to rakho ek na yaad

bhuul kar bhī kabhī hove to vafā yaad rahe

mahv itnā bhī na ho ishq-e-butāñ meñ ai 'zauq'

chāhiye bande ko har vaqt ḳhudā yaad rahe

chashm-e-qatil hamein kyunkar na bhala yaad rahe

maut insan ko lazim hai sada yaad rahe

mera KHun hai tere kuche mein baha yaad rahe

ye baha wo nahin jis ka na baha yaad rahe

kushta-e-zulf ke marqad pe tu ai laila-wash

bed-e-majnun hi laga ta-ki pata yaad rahe

KHaksari hai ajab wasf ki jun jun ho siwa

ho safa aur dil-e-ahl-e-safa yaad rahe

ho ye labbaik-e-haram ya ye azan-e-masjid

mai-kasho qulqul-e-mina ki sada yaad rahe

yaad us wada-faramosh ne ghairon se badi

yaad kuchh kam to na thi aur siwa yaad rahe

KHat bhi likhte hain to lete hain KHatai kaghaz

dekhiye kab tak unhen meri KHata yaad rahe

do waraq mein kaf-e-hasrat ke do aalam ka hai ilm

sabaq-e-ishq agar tujh ko dila yaad rahe

qatl-e-ashiq pe kamar bandhi hai ai dil us ne

par KHuda hai ki use nam mera yaad rahe

taer-e-qibla-numa ban ke kaha dil ne mujhe

ki taDap kar yun hi mar jaega ja yaad rahe

jab ye din-dar hain duniya ki namazen paDhte

kash us waqt unhen nam-e-KHuda yaad rahe

hum pe sau bar jafa ho to rakho ek na yaad

bhul kar bhi kabhi howe to wafa yaad rahe

mahw itna bhi na ho ishq-e-butan mein ai 'zauq'

chahiye bande ko har waqt KHuda yaad rahe