چودھریوں کے ہوس کدے میں اک مٹیار اکیلی ہے

چودھریوں کے ہوس کدے میں اک مٹیار اکیلی ہے

کتنی بڑی ہے لیکن پھر بھی کیسی تنگ حویلی ہے

مجھ کو پرندوں کی نگری میں چھوڑ کے جانا ہے تو جا

سائیں میری فکر نہ کرنا میرا اللہ بیلی ہے

ایک بھکارن بچی نے یہ عذر عجیب سا پیش کیا

بابو مجھ کو پیسے دے دے میری ماں سوتیلی ہے

روتے روتے جس کے لئے اک عمر رہا ہوں میں زندہ

آج ملا تو ہنس کر اس سے زہر کی پڑیا لے لی ہے

کیسے اس آنگن کو عاصمؔ کمرے میں تبدیل کروں

جس میں چڑیا اور تتلی سے میری بیٹی کھیلی ہے