chehra udas udas tha maila libas tha

chehra udaas udaas thā mailā libās thā

kyā din the jab ḳhayāl-e-tamannā libās thā

uryāñ zamāna-gīr sharar-gūñ jibillateñ

kuchh thā to ek barg-e-dil un kā libās thā

us moḌ par abhī jise dekhā hai kaun thā

sambhalī huī nigāh thī saada libās thā

yādoñ ke dhuñdle des khilī chāñdnī meñ raat

terā sukūt kis kī sadā kā libās thā

aise bhī log haiñ jinheñ parkhā to un kī ruuh

be-pairahan thī jism sarāpā libās thā

sadiyoñ ke ghaaT par bhare meloñ kī bhiiḌ meñ

ai dard-e-shādmāñ tirā kyā kyā libās thā

dekhā to dil ke sāmne sāyoñ ke jashn meñ

har aks-e-ārzū kā anokhā libās thā

'amjad' qabā-e-shah thī ki cholā faqīr kā

har bhes meñ zamīr kā pardā libās thā

chehra udas udas tha maila libas tha

kya din the jab KHayal-e-tamanna libas tha

uryan zamana-gir sharar-gun jibillaten

kuchh tha to ek barg-e-dil un ka libas tha

us moD par abhi jise dekha hai kaun tha

sambhali hui nigah thi sada libas tha

yaadon ke dhundle des khili chandni mein raat

tera sukut kis ki sada ka libas tha

aise bhi log hain jinhen parkha to un ki ruh

be-pairahan thi jism sarapa libas tha

sadiyon ke ghaT par bhare melon ki bhiD mein

ai dard-e-shadman tera kya kya libas tha

dekha to dil ke samne sayon ke jashn mein

har aks-e-arzu ka anokha libas tha

'amjad' qaba-e-shah thi ki chola faqir ka

har bhes mein zamir ka parda libas tha