chehre ke KHad-o-Khaal mein aaine jaDe hain

chehre ke ḳhad-o-ḳhāl meñ ā.īne jaḌe haiñ

ham 'umr-e-gurezāñ ke muqābil meñ khaḌe haiñ

har saal nayā saal hai har saal gayā saal

ham uḌte hue lamhoñ kī chaukhaT pe paḌe haiñ

dekhā hai ye parchhā.īñ kī duniyā meñ ki aksar

apne qad-o-qāmat se bhī kuchh log baḌe haiñ

shāyad ki mile zaat ke zindāñ se rihā.ī

dīvār ko chāTā hai havāoñ se laḌe haiñ

uḌte haiñ parinde to yahāñ jhiil bhī hogī

taptā hai bayābān-e-badan kos kaḌe haiñ

shāyad koī 'īsā-nafas aa.e unheñ pūchhe

ye lafz jo be-jān se kāġhaz pe paḌe haiñ

is baat kā mafhūm maiñ samjhā nahīñ 'aḳhtar'

tasvīr meñ sāhil pe ka.ī kachche ghaḌe haiñ

chehre ke KHad-o-KHal mein aaine jaDe hain

hum 'umr-e-gurezan ke muqabil mein khaDe hain

har sal naya sal hai har sal gaya sal

hum uDte hue lamhon ki chaukhaT pe paDe hain

dekha hai ye parchhain ki duniya mein ki aksar

apne qad-o-qamat se bhi kuchh log baDe hain

shayad ki mile zat ke zindan se rihai

diwar ko chaTa hai hawaon se laDe hain

uDte hain parinde to yahan jhil bhi hogi

tapta hai bayaban-e-badan kos kaDe hain

shayad koi 'isa-nafas aae unhen puchhe

ye lafz jo be-jaan se kaghaz pe paDe hain

is baat ka mafhum main samjha nahin 'aKHtar'

taswir mein sahil pe kai kachche ghaDe hain