chhak gae hain aaj ek saghar se hum

chhak ga.e haiñ aaj ik sāġhar se ham

haath dho baiThe mai-e-kausar se ham

but-kade meñ jā ke us but kā pata

pūchhte phirte haiñ har patthar se ham

qasd-e-sahrā hai dil-e-vīrāñ ke saath

ik bayābāñ le chale haiñ ghar se ham

jab rag-e-jāñ se kamī kartā hai ḳhuun

chheḌ dete haiñ use nishtar se ham

kis qadar kaTtī hai rāh-e-shauq jald

tez chalte haiñ tire ḳhanjar se ham

kyā kaheñ kis se kaheñ kis ke liye

phirte haiñ chāroñ taraf muztar se ham

vo sitamgar rū-ba-rū hogā to 'dāġh'

kyā kaheñge dāvar-e-mahshar se ham

chhak gae hain aaj ek saghar se hum

hath dho baiThe mai-e-kausar se hum

but-kade mein ja ke us but ka pata

puchhte phirte hain har patthar se hum

qasd-e-sahra hai dil-e-viran ke sath

ek bayaban le chale hain ghar se hum

jab rag-e-jaan se kami karta hai KHun

chheD dete hain use nishtar se hum

kis qadar kaTti hai rah-e-shauq jald

tez chalte hain tere KHanjar se hum

kya kahen kis se kahen kis ke liye

phirte hain chaaron taraf muztar se hum

wo sitamgar ru-ba-ru hoga to 'dagh'

kya kahenge dawar-e-mahshar se hum