chhan ke aati hai jo ye raushni darwaze se

chhan ke aatī hai jo ye raushnī darvāze se

kyā mujhe dekh rahā hai koī darvāze se

ghar kī taḳhtī se milā aaj mujhe apnā pata

apne hone kī gavāhī milī darvāze se

maiñ ne dahlīz se jaane kī ijāzat le lī

phir mirī baat na tai ho sakī darvāze se

ek rauzan meñ paḌī aañkh se khulne lage haiñ

ek dīvār ke andar ka.ī darvāze se

maiñ ne is ḳhvāb ko andar kahīñ mismār kiyā

merī āvāz na bāhar ga.ī darvāze se

raat bhar siskiyāñ letā hai koī shaḳhs yahāñ

kabhī dīvār se lag kar kabhī darvāze se

ḳhālī kamra mirā kis chaap se bhar jaatā hai

aatā jaatā hī nahīñ jab koī darvāze se

ek ḳhushbū ne qadam bhuul ke bāhar rakkhā

phir galī aañkh milāne lagī darvāze se

roz ik shahr-e-pur-asrār meñ kho jaatā huuñ

vahī galiyāñ vahī raste vahī darvāze se

tū ne mahtāb nikalte hue dekhā hai kabhī

aur mahtāb bhī aise kisī darvāze se

chhan ke aati hai jo ye raushni darwaze se

kya mujhe dekh raha hai koi darwaze se

ghar ki taKHti se mila aaj mujhe apna pata

apne hone ki gawahi mili darwaze se

main ne dahliz se jaane ki ijazat le li

phir meri baat na tai ho saki darwaze se

ek rauzan mein paDi aankh se khulne lage hain

ek diwar ke andar kai darwaze se

main ne is KHwab ko andar kahin mismar kiya

meri aawaz na bahar gai darwaze se

raat bhar siskiyan leta hai koi shaKHs yahan

kabhi diwar se lag kar kabhi darwaze se

KHali kamra mera kis chap se bhar jata hai

aata jata hi nahin jab koi darwaze se

ek KHushbu ne qadam bhul ke bahar rakkha

phir gali aankh milane lagi darwaze se

roz ek shahr-e-pur-asrar mein kho jata hun

wahi galiyan wahi raste wahi darwaze se

tu ne mahtab nikalte hue dekha hai kabhi

aur mahtab bhi aise kisi darwaze se