chhaton pe aag rahi baam-o-dar pe dhup rahi

chhatoñ pe aag rahī bām-o-dar pe dhuup rahī

sahar se shaam talak bahr-o-bar pe dhuup rahī

bahut dinoñ se jo bādal idhar nahīñ aa.e

daraḳht sūkhe rahe rahguzar pe dhuup rahī

kuchh aise vaqt pe nikle the apne ghar se ham

jahāñ jahāñ bhī ga.e apne sar pe dhuup rahī

ġhurūb ho gayā sūraj magar fazāoñ meñ

vahī tapish hai ki jaise nagar pe dhuup rahī

ravish ravish pe rahā āftāb kā saaya

jahān-e-ġhuncha-o-barg-o-samar pe dhuup rahī

araq araq hai jabīñ pairahan pasīna hai

bashar hī jaane ki kaisī bashar pe dhuup rahī

jahān-e-karb-o-balā ham ko yaad aayā hai

kuchh aisī ab ke hamāre nagar pe dhuup rahī

ravāñ-davāñ hameñ phirnā thā dasht-e-ġhurbat meñ

kabhī jo ghar meñ rahe haiñ to ghar pe dhuup rahī

usī parinde kī sūrat hameñ bhī jiinā thā

jo din ko uḌtā rahā bāl-o-par pe dhuup rahī

tamām din mujhe sūraj ke saath chalnā thā

mire sabab se mire ham-safar pe dhuup rahī

yahī to soch ke 'iqbāl' ko nadāmat hai

shajar ke saa.e meñ ham aur shajar pe dhuup rahī

chhaton pe aag rahi baam-o-dar pe dhup rahi

sahar se sham talak bahr-o-bar pe dhup rahi

bahut dinon se jo baadal idhar nahin aae

daraKHt sukhe rahe rahguzar pe dhup rahi

kuchh aise waqt pe nikle the apne ghar se hum

jahan jahan bhi gae apne sar pe dhup rahi

ghurub ho gaya suraj magar fazaon mein

wahi tapish hai ki jaise nagar pe dhup rahi

rawish rawish pe raha aaftab ka saya

jahan-e-ghuncha-o-barg-o-samar pe dhup rahi

araq araq hai jabin pairahan pasina hai

bashar hi jaane ki kaisi bashar pe dhup rahi

jahan-e-karb-o-bala hum ko yaad aaya hai

kuchh aisi ab ke hamare nagar pe dhup rahi

rawan-dawan hamein phirna tha dasht-e-ghurbat mein

kabhi jo ghar mein rahe hain to ghar pe dhup rahi

usi parinde ki surat hamein bhi jina tha

jo din ko uDta raha baal-o-par pe dhup rahi

tamam din mujhe suraj ke sath chalna tha

mere sabab se mere ham-safar pe dhup rahi

yahi to soch ke 'iqbaal' ko nadamat hai

shajar ke sae mein hum aur shajar pe dhup rahi