chhin kar wo lazzat-e-saut-o-sada le jaega

chhīn kar vo lazzat-e-saut-o-sadā le jā.egā

haath shal kar jā.egā harf-e-duā le jā.egā

biich kā baḌhtā huā har fāsla le jā.egā

ek tūfāñ aa.egā sab kuchh bahā le jā.egā

dekhnā baḌhtā huā ye ḳhvāhishoñ kā silsila

mauj-e-ḳhūñ dikhlā.egā rañg-e-hinā le jā.egā

be-muqaddar chhoḌ jā.egā sabhī peshāniyāñ

raushnī āñkhoñ kī siine kī ziyā le jā.egā

ghar se jaate vaqt vo ab ke buzurgoñ kī duā

le to jā.egā magar Dartā huā le jā.egā

lams meñ mil jā.egā āvāz kā asrār bhī

pāniyoñ ke paikaroñ ko bhī uThā le jā.egā

ik parinda raat kī chaukhaT pe aa.egā 'nizām'

dekhnā hai degā kyā aur ham se kyā le jā.egā

chhin kar wo lazzat-e-saut-o-sada le jaega

hath shal kar jaega harf-e-dua le jaega

bich ka baDhta hua har fasla le jaega

ek tufan aaega sab kuchh baha le jaega

dekhna baDhta hua ye KHwahishon ka silsila

mauj-e-KHun dikhlaega rang-e-hina le jaega

be-muqaddar chhoD jaega sabhi peshaniyan

raushni aankhon ki sine ki ziya le jaega

ghar se jate waqt wo ab ke buzurgon ki dua

le to jaega magar Darta hua le jaega

lams mein mil jaega aawaz ka asrar bhi

paniyon ke paikaron ko bhi uTha le jaega

ek parinda raat ki chaukhaT pe aaega 'nizam'

dekhna hai dega kya aur hum se kya le jaega