chhin le quwwat binai KHudaya mujhse

chhīn le quvvat bīnā.ī ḳhudāyā mujh se

dekhā jaatā nahīñ ab terā tamāshā mujh se

ek muddat se azā-dār-e-alam-dār huuñ maiñ

TūTne vaalā nahīñ pyaas kā rishta mujh se

ghaTtā rahtā huuñ maiñ vīrān havelī kī tarah

bhāgtā phirtā hai hañgāma-e-duniyā mujh se

ab kisī meñ bhī yahāñ tāb-e-samā.at na rahī

koī suntā hī nahīñ hai mirā qissa mujh se

mujh ko har lamha qanā.at ne sar-afrāz kiyā

muflisī varna tirā bojh na uThtā mujh se

chain se kaTtī hai ab ḳhema-e-gum-nāmī meñ

koī rishta hī nahīñ ḳhalq-e-ḳhudā kā mujh se

dekhtā hī nahīñ vo merī bulandī kī taraf

ya.anī sharminda hai ab vaqt kā ziina mujh se

fāqa-mastī meñ bhī qaa.em hai mirī kaj-kulahī

aur kyā chāhtī hai azmat-e-rafta mujh se

kab utāroge mire jism se ġhurbat kā libās

pūchhtī hai mirī dīvār-e-shikasta mujh se

chhin le quwwat binai KHudaya mujh se

dekha jata nahin ab tera tamasha mujh se

ek muddat se aza-dar-e-alam-dar hun main

TuTne wala nahin pyas ka rishta mujh se

ghaTta rahta hun main viran haweli ki tarah

bhagta phirta hai hangama-e-duniya mujh se

ab kisi mein bhi yahan tab-e-samaat na rahi

koi sunta hi nahin hai mera qissa mujh se

mujh ko har lamha qanaat ne sar-afraaz kiya

muflisi warna tera bojh na uThta mujh se

chain se kaTti hai ab KHema-e-gum-nami mein

koi rishta hi nahin KHalq-e-KHuda ka mujh se

dekhta hi nahin wo meri bulandi ki taraf

yani sharminda hai ab waqt ka zina mujh se

faqa-masti mein bhi qaem hai meri kaj-kulahi

aur kya chahti hai azmat-e-rafta mujh se

kab utaroge mere jism se ghurbat ka libas

puchhti hai meri diwar-e-shikasta mujh se