چھوڑ دوں شہر ترا چھوڑ دوں دنیا تیری

چھوڑ دوں شہر ترا چھوڑ دوں دنیا تیری

مجھ کو معلوم نہ تھا کیا ہے تمنا تیری

میں اندھیرے میں نہیں دن کے اجالے میں لٹا

اب کسے ڈھونڈھے ہے شمع رخ زیبا تیری

جب کوئی پاس مروت سے کرم کرتا ہے

یاد آتی ہے بہت رنجش بے جا تیری

پے بہ پے ساتھ چھٹا جاتا ہے اک دنیا کا

دم بہ دم یاد چلی آتی ہے گویا تیری

دامن و دست رسا بات خدا ساز تو ہے

نارسائی بھی مشیت ہے خدایا تیری

منہدم ہو گئی دیوار‌ دل دیوانہ

میری قسمت میں تھی تصویر‌‌ شکستہ تیری

تار تار نفس جاں میں ترا نغمہ ہے

پیرہن میں ہے ابھی بوئے شناسا تیری

غزل شاذؔ ہے صدقہ تری رعنائی کا

رگ ہر شعر میں ہے موج سراپا تیری