chhoD jaenge qafile wale

chhoḌ jā.eñge qāfile vaale

ham to haiñ peḌ rāste vaale

ḳhvāb pahlī azaan par TuuTā

ham the dariyā meñ kūdne vaale

dekh aayā huā hai āñkhoñ meñ

zahr kānoñ meñ gholne vaale

aap se apnā ik ta.alluq hai

ham nahīñ log vāste vaale

ik zamāna thā iid aane par

ham manāte the rūThne vaale

mujh ko taslīm kyuuñ nahīñ karte

merī tasvīr chūmne vaale

sharm se aap kī jhukī palkeñ

varna to ham the Dūbne vaale

har qadam phūñk phūñk rakhnā hai

deñ na deñ saath mashvare vaale

Dhiil dene se bach ga.e mahbūb

varna rishte the TūTne vaale

chhoD jaenge qafile wale

hum to hain peD raste wale

KHwab pahli azan par TuTa

hum the dariya mein kudne wale

dekh aaya hua hai aankhon mein

zahr kanon mein gholne wale

aap se apna ek talluq hai

hum nahin log waste wale

ek zamana tha id aane par

hum manate the ruThne wale

mujh ko taslim kyun nahin karte

meri taswir chumne wale

sharm se aap ki jhuki palken

warna to hum the Dubne wale

har qadam phunk phunk rakhna hai

den na den sath mashware wale

Dhil dene se bach gae mahbub

warna rishte the TuTne wale