chhoD kar chal diya ghurbat mein wahi dil mujhko

chhoḌ kar chal diyā ġhurbat meñ vahī dil mujh ko

ek hamdard milā thā jo ba-mushkil mujh ko

ab sivā ġham nahīñ kuchh ziist kā hāsil mujh ko

ḳhauf-e-girdāb na darkār hai sāhil mujh ko

dil bhī qassam-e-azal ne vo diyā qismat se

jis ne duniyā meñ na rakkhā kisī qābil mujh ko

mujh ko kyā ġham jo haiñ tārīk adam ke raste

dāġh-e-dil hoñge charāġh-e-rah-e-manzil mujh ko

manzileñ ishq kī mushkil thiiñ ḳhatarnāk bhī thiiñ

mil gayā dil sā magar rahbar-e-kāmil mujh ko

hasrat-o-yās-o-alam rah ga.e bairūn-e-lahad

qāfile vāloñ ne chhoḌā sar-e-manzil mujh ko

fikr kuchh sher-o-suḳhan kī bhī karūñ maiñ 'sho.ala'

deñ jo fursat kabhī afkār-o-mashāġhil mujh ko

chhoD kar chal diya ghurbat mein wahi dil mujh ko

ek hamdard mila tha jo ba-mushkil mujh ko

ab siwa gham nahin kuchh zist ka hasil mujh ko

KHauf-e-girdab na darkar hai sahil mujh ko

dil bhi qassam-e-azal ne wo diya qismat se

jis ne duniya mein na rakkha kisi qabil mujh ko

mujh ko kya gham jo hain tarik adam ke raste

dagh-e-dil honge charagh-e-rah-e-manzil mujh ko

manzilen ishq ki mushkil thin KHatarnak bhi thin

mil gaya dil sa magar rahbar-e-kaamil mujh ko

hasrat-o-yas-o-alam rah gae bairun-e-lahad

qafile walon ne chhoDa sar-e-manzil mujh ko

fikr kuchh sher-o-suKHan ki bhi karun main 'shoala'

den jo fursat kabhi afkar-o-mashaghil mujh ko