chhoTi si ek arz hai meri janab se

chhoTī sī ek 'arz hai merī janāb se

āñkhoñ kī mai pilā ke bachā.eñ sharāb se

zāhid sharāb muñh se jo tere kabhī lagī

mujh ko Darā sakegā na phir tū 'azāb se

shabnam ke chand qatroñ ko phūloñ se chhīn ke

kyā mil gayā hai pūchhe koī āftāb se

maanā ki ham se ho ke judā tum udaas ho

ham bhī rahe kahīñ ke na is inqalāb se

sīkheñ ise bhī paḌh ke mohabbat hai chiiz kyā

kuchh fā.eda uThā.iye dil kī kitāb se

is tishnagī meñ khaa.e haiñ maiñ ne baḌe fareb

dariyā bhī lag rahe haiñ jo mujh ko sarāb se

kyā lutf rah gayā hai phir us shaḳhs ke liye

mahrūm ho gayā hai jo 'nāsir' sharāb se

chhoTi si ek 'arz hai meri janab se

aankhon ki mai pila ke bachaen sharab se

zahid sharab munh se jo tere kabhi lagi

mujh ko Dara sakega na phir tu 'azab se

shabnam ke chand qatron ko phulon se chhin ke

kya mil gaya hai puchhe koi aaftab se

mana ki hum se ho ke juda tum udas ho

hum bhi rahe kahin ke na is inqalab se

sikhen ise bhi paDh ke mohabbat hai chiz kya

kuchh faeda uThaiye dil ki kitab se

is tishnagi mein khae hain main ne baDe fareb

dariya bhi lag rahe hain jo mujh ko sarab se

kya lutf rah gaya hai phir us shaKHs ke liye

mahrum ho gaya hai jo 'nasir' sharab se