chhup ke duniya se sawad-e-dil-e-KHamosh mein aa

chhup ke duniyā se savād-e-dil-e-ḳhāmosh meñ aa

aa yahāñ tū mirī tarsī huī āġhosh meñ aa

aur duniyā meñ kahīñ terā Thikāna hī nahīñ

ai mire dil kī tamannā lab-e-ḳhāmosh meñ aa

mai-e-rañgīñ pas-e-mīnā se ishāre kab tak

ek din sāġhar-e-rindān-e-balā-nosh meñ aa

ishq kartā hai to phir ishq kī tauhīn na kar

yā to behosh na ho ho to na phir hosh meñ aa

tū badal de na kahīñ jauhar-e-insāñ kā bhī rañg

ai zamāne ke lahū dekh na yuuñ josh meñ aa

dekh kyā daam lagātī hai nigāh-e-'mullā'

kabhī ai ġhuncha-e-tar dast-e-gul-afrosh meñ aa

chhup ke duniya se sawad-e-dil-e-KHamosh mein aa

aa yahan tu meri tarsi hui aaghosh mein aa

aur duniya mein kahin tera Thikana hi nahin

ai mere dil ki tamanna lab-e-KHamosh mein aa

mai-e-rangin pas-e-mina se ishaare kab tak

ek din saghar-e-rindan-e-bala-nosh mein aa

ishq karta hai to phir ishq ki tauhin na kar

ya to behosh na ho ho to na phir hosh mein aa

tu badal de na kahin jauhar-e-insan ka bhi rang

ai zamane ke lahu dekh na yun josh mein aa

dekh kya dam lagati hai nigah-e-'mulla'

kabhi ai ghuncha-e-tar dast-e-gul-afrosh mein aa