chhupaen kis tarah aankhen chamak mohabbat ki

chhupā.eñ kis tarah āñkheñ chamak mohabbat kī

in ā.inoñ meñ hai har dam jhalak mohabbat kī

dhaḌak rahī hai koī yaad surḳh phūloñ meñ

jhapak rahī hai diloñ meñ palak mohabbat kī

ajiib rañg kisī kī nazar se chhiTke haiñ

badan meñ phail rahī hai dhanak mohabbat kī

har ek shāḳh pe khilne lage bahār meñ phuul

har ek dil meñ uThī hai kasak mohabbat kī

dikhā.ī detā hai ik aks chāñd tāroñ meñ

sajātā rahtā hai rāheñ falak mohabbat kī

hasīn hote haiñ din ḳhvāb se lapeTe hue

gulāb kartī haiñ rāteñ mahak mohabbat kī

ka.ī dinoñ se mujhe 'nāz' aisā lagtā hai

qarār le ga.ī jaise lapak mohabbat kī

chhupaen kis tarah aankhen chamak mohabbat ki

in aainon mein hai har dam jhalak mohabbat ki

dhaDak rahi hai koi yaad surKH phulon mein

jhapak rahi hai dilon mein palak mohabbat ki

ajib rang kisi ki nazar se chhiTke hain

badan mein phail rahi hai dhanak mohabbat ki

har ek shaKH pe khilne lage bahaar mein phul

har ek dil mein uThi hai kasak mohabbat ki

dikhai deta hai ek aks chand taron mein

sajata rahta hai rahen falak mohabbat ki

hasin hote hain din KHwab se lapeTe hue

gulab karti hain raaten mahak mohabbat ki

kai dinon se mujhe 'naz' aisa lagta hai

qarar le gai jaise lapak mohabbat ki