chhupi hai tujh mein koi shai use na ghaarat kar

chhupī hai tujh meñ koī shai use na ġhārat kar

jo ho sake to kahīñ dil lagā mohabbat kar

adā ye kis kaTe patte se tū ne sīkhī hai

sitam havā kā ho aur shāḳh se shikāyat kar

na ho muḳhil mire andar kī ek duniyā meñ

baḌī ḳhushī se bar-o-bahr par hukūmat kar

vo apne aap na samjhegā tere dil meñ hai kyā

ḳhalish ko harf banā harf ko hikāyat kar

mire banā.e hue but meñ ruuh phūñk de ab

na ek umr kī mehnat mirī akārat kar

kahāñ se aa gayā tū bazm-e-kam-yaqīnāñ meñ

yahāñ na hogā koī ḳhush hazār ḳhidmat kar

kuchh aur chīzeñ haiñ duniyā ko jo badaltī haiñ

ki apne dard ko apne liye ibārat kar

nahīñ ajab isī pal kā ho muntazir vo bhī

ki chhū le us ke badan ko zarā sī himmat kar

ḳhulūs terā bhī ab zad meñ aa gayā 'bānī'

yahāñ ye roz ke qisse haiñ jī burā mat kar

chhupi hai tujh mein koi shai use na ghaarat kar

jo ho sake to kahin dil laga mohabbat kar

ada ye kis kaTe patte se tu ne sikhi hai

sitam hawa ka ho aur shaKH se shikayat kar

na ho muKHil mere andar ki ek duniya mein

baDi KHushi se bar-o-bahr par hukumat kar

wo apne aap na samjhega tere dil mein hai kya

KHalish ko harf bana harf ko hikayat kar

mere banae hue but mein ruh phunk de ab

na ek umr ki mehnat meri akarat kar

kahan se aa gaya tu bazm-e-kam-yaqinan mein

yahan na hoga koi KHush hazar KHidmat kar

kuchh aur chizen hain duniya ko jo badalti hain

ki apne dard ko apne liye ibarat kar

nahin ajab isi pal ka ho muntazir wo bhi

ki chhu le us ke badan ko zara si himmat kar

KHulus tera bhi ab zad mein aa gaya 'bani'

yahan ye roz ke qisse hain ji bura mat kar