chhuT gae hum jo asir-e-gham-e-hijran ho kar

chhuT ga.e ham jo asīr-e-ġham-e-hijrāñ ho kar

uḌ gayā rañg-e-ruḳh-e-yār pareshāñ ho kar

kūcha-e-yār se uTThe na pareshāñ ho kar

mil ga.e ḳhaak meñ ḳhāk-e-dar-e-jānāñ ho kar

saath apne dil-e-bīmār ko lete jaao

kyuuñ hoñ ham tum se ḳhajil tālib-e-darmāñ ho kar

na gila tum se sitam kā na vafā kā shikva

kyā karoge mire ahvāl ke pursāñ ho kar

haal apnā jo bayāñ kartā huuñ logoñ se 'rashīd'

dekhte haiñ mirī sūrat vo pareshāñ ho kar

chhuT gae hum jo asir-e-gham-e-hijran ho kar

uD gaya rang-e-ruKH-e-yar pareshan ho kar

kucha-e-yar se uTThe na pareshan ho kar

mil gae KHak mein KHak-e-dar-e-jaanan ho kar

sath apne dil-e-bimar ko lete jao

kyun hon hum tum se KHajil talib-e-darman ho kar

na gila tum se sitam ka na wafa ka shikwa

kya karoge mere ahwal ke pursan ho kar

haal apna jo bayan karta hun logon se 'rashid'

dekhte hain meri surat wo pareshan ho kar