chhuTta hi nahin ho jise aazar-e-mohabbat

chhuTtā hī nahīñ ho jise āzār-e-mohabbat

māyūs huuñ maiñ bhī ki huuñ bīmār-e-mohabbat

imkāñ nahīñ jīte-jī ho is qaid se āzād

mar jaa.e tabhī chhūTe giraftār-e-mohabbat

taqsīr na ḳhūbāñ kī na jallād kā kuchh jurm

thā dushman-e-jānī mirā iqrār-e-mohabbat

har jins ke ḳhvāhāñ mile bāzār-e-jahāñ meñ

lekin na milā koī ḳharīdār-e-mohabbat

is raaz ko rakh jī hī meñ tā jī bache terā

zinhār jo kartā ho tū iz.hār-e-mohabbat

har naqsh-e-qadam par tire sar beche haiñ āshiq

Tuk sair to kar aaj tū bāzār-e-mohabbat

kuchh mast haiñ ham dīda-e-pur-ḳhūn-e-jigar se

aayā yahī hai sāġhar-e-sarshār-e-mohabbat

bekār na rah ishq meñ tū rone se hargiz

ye girya hī hai āb-e-ruḳh-e-kār-e-mohabbat

mujh sā hī ho majnūñ bhī ye kab maane hai aaqil

har sar nahīñ ai 'mīr' sazā-vār-e-mohabbat

chhuTta hi nahin ho jise aazar-e-mohabbat

mayus hun main bhi ki hun bimar-e-mohabbat

imkan nahin jite-ji ho is qaid se aazad

mar jae tabhi chhuTe giraftar-e-mohabbat

taqsir na KHuban ki na jallad ka kuchh jurm

tha dushman-e-jaani mera iqrar-e-mohabbat

har jins ke KHwahan mile bazar-e-jahan mein

lekin na mila koi KHaridar-e-mohabbat

is raaz ko rakh ji hi mein ta ji bache tera

zinhaar jo karta ho tu izhaar-e-mohabbat

har naqsh-e-qadam par tere sar beche hain aashiq

Tuk sair to kar aaj tu bazar-e-mohabbat

kuchh mast hain hum dida-e-pur-KHun-e-jigar se

aaya yahi hai saghar-e-sarshaar-e-mohabbat

bekar na rah ishq mein tu rone se hargiz

ye girya hi hai aab-e-ruKH-e-kar-e-mohabbat

mujh sa hi ho majnun bhi ye kab mane hai aaqil

har sar nahin ai 'mir' saza-war-e-mohabbat