pani mein kankar barsaya karte the

paanī meñ kankar barsāyā karte the

vo din jab ham lamhe zaayā karte the

hoḌ havā se aksar lagtī thī apnī

aksar us ko dhuul chaTāyā karte the

dekh ke ham ko rāhguzar muskātī thī

peḌ bhī aage baḌh kar chhāyā karte the

dhuup baTorā karte the ham saarā din

shaam ko baañT ke ghar le jaayā karte the

aaj ghaTā afsurda kartī hai ham ko

ham bārish meñ ḳhuub nahāyā karte the

ek yahī ham dekheñ sab ḳhāmoshī se

ek yahī ham shor machāyā karte the

'saurabh' shab thī ek varaq saada jis par

likh likh kar ham ḳhvāb miTāyā karte the

pani mein kankar barsaya karte the

wo din jab hum lamhe zaya karte the

hoD hawa se aksar lagti thi apni

aksar us ko dhul chaTaya karte the

dekh ke hum ko rahguzar muskati thi

peD bhi aage baDh kar chhaya karte the

dhup baTora karte the hum sara din

sham ko banT ke ghar le jaya karte the

aaj ghaTa afsurda karti hai hum ko

hum barish mein KHub nahaya karte the

ek yahi hum dekhen sab KHamoshi se

ek yahi hum shor machaya karte the

'saurabh' shab thi ek waraq sada jis par

likh likh kar hum KHwab miTaya karte the