chitwan durust sean baja baaten Thik-Thik

chitvan durust sean bajā bāteñ Thīk-Thīk

nāz-o-adā kī us meñ haiñ sab bāteñ Thīk-Thīk

kyā dil ko achchhī lagtī haiñ in ḳhush-qadoñ kī aah

ye pyārī pyārī boliyāñ ye gāteñ Thīk-Thīk

muñh meñ tamāñche chhātī meñ ghūñsa kamar meñ laat

kyā kyā huiiñ ye mujh pe ināyāteñ Thīk-Thīk

mauqa.a se bosa mauqa.a se gaalī bhī ham ko dī

kī shoḳh ne ye donoñ madārāteñ Thīk-Thīk

jab dostī meñ qaul ke puure hoñ donoñ shaḳhs

hotī haiñ phir to kyā hī mulāqāteñ Thīk-Thīk

jab ban paḌī to shaiḳh-jī shaiḳhī na māreñ kyā

ham se bhī phir to hoveñ karāmāteñ Thīk-Thīk

sach hai ba-qaul-e-hazrat-e-sayyad 'nazīr' aah

ban aatī haiñ to hotī haiñ sab bāteñ Thīk-Thīk

chitwan durust sean baja baaten Thik-Thik

naz-o-ada ki us mein hain sab baaten Thik-Thik

kya dil ko achchhi lagti hain in KHush-qadon ki aah

ye pyari pyari boliyan ye gaten Thik-Thik

munh mein tamanche chhati mein ghunsa kamar mein lat

kya kya huin ye mujh pe inayaten Thik-Thik

mauqa se bosa mauqa se gali bhi hum ko di

ki shoKH ne ye donon madaraaten Thik-Thik

jab dosti mein qaul ke pure hon donon shaKHs

hoti hain phir to kya hi mulaqaten Thik-Thik

jab ban paDi to shaiKH-ji shaiKHi na maren kya

hum se bhi phir to howen karamaten Thik-Thik

sach hai ba-qaul-e-hazrat-e-sayyad 'nazir' aah

ban aati hain to hoti hain sab baaten Thik-Thik