chitwan ki kahun ya ki ishaaraat ki garmi

chitvan kī kahūñ yā ki ishārāt kī garmī

hai nām-e-ḳhudā us meñ har ik baat kī garmī

rone se mire us ko araq aa gayā yaaro

sach hai ki burī hotī hai barsāt kī garmī

Tuk phuul chhuā thā so nazākat se ka.ī baar

rah rah ke dikhā.ī mujhe gul-hāt kī garmī

khulvāte hī bundoñ ke badan garm ho aayā

shāyad ki lagī us ko mire haat kī garmī

jaltā huuñ maiñ aur sho.ale nahīñ dete dikhā.ī

hai ishq meñ yaaro ye tilismāt kī garmī

rahnā hai koī din to samajh jā.iyo ai dil

yaañ phir vahī Thahrī hai mulāqāt kī garmī

garmī thī kahīñ aah ham afsurda-diloñ meñ

saaqī kī faqat hai ye ināyāt kī garmī

aate hī jo tum mere gale lag ga.e vallāh

us vaqt to is garmī ne sab maat kī garmī

kahtā hai vo jis dam ki chalo ham se na bolo

is baat meñ hai aur hī ik baat kī garmī

sab poch hai zāhir kī ye shoḳhī-o-sharārat

ma.ashūq meñ jab tak ki na ho zaat kī garmī

tum ġhussa ho yā qahr ho ātish ho ġhazab ho

ab ham ne ye sab dil pe musāvāt kī garmī

yā-hazrat-e-dil tum to baḌe sāhib-e-dil the

rakhte the bahut apne kamālāt kī garmī

ik hī nigah-e-garm se bas ho ga.e tum sard

ab kahiye kahāñ hai vo karāmāt kī garmī

yuuñ garmi-e-sohbat to bahut hogī 'nazīr' aah

par yaar na bhūlegī mujhe raat kī garmī

chitwan ki kahun ya ki ishaaraat ki garmi

hai nam-e-KHuda us mein har ek baat ki garmi

rone se mere us ko araq aa gaya yaro

sach hai ki buri hoti hai barsat ki garmi

Tuk phul chhua tha so nazakat se kai bar

rah rah ke dikhai mujhe gul-hat ki garmi

khulwate hi bundon ke badan garm ho aaya

shayad ki lagi us ko mere hat ki garmi

jalta hun main aur shoale nahin dete dikhai

hai ishq mein yaro ye tilismat ki garmi

rahna hai koi din to samajh jaiyo ai dil

yan phir wahi Thahri hai mulaqat ki garmi

garmi thi kahin aah hum afsurda-dilon mein

saqi ki faqat hai ye inayat ki garmi

aate hi jo tum mere gale lag gae wallah

us waqt to is garmi ne sab mat ki garmi

kahta hai wo jis dam ki chalo hum se na bolo

is baat mein hai aur hi ek baat ki garmi

sab poch hai zahir ki ye shoKHi-o-shararat

mashuq mein jab tak ki na ho zat ki garmi

tum ghussa ho ya qahr ho aatish ho ghazab ho

ab hum ne ye sab dil pe musawat ki garmi

ya-hazrat-e-dil tum to baDe sahib-e-dil the

rakhte the bahut apne kamalat ki garmi

ek hi nigah-e-garm se bas ho gae tum sard

ab kahiye kahan hai wo karamat ki garmi

yun garmi-e-sohbat to bahut hogi 'nazir' aah

par yar na bhulegi mujhe raat ki garmi