chori kaisi bhi ho ye lat bhi buri hoti hai

chorī kaisī bhī ho ye lat bhī burī hotī hai

dil churā lene kī aadat bhī burī hotī hai

achchhī aadat kā nafā log uThā lete haiñ

had se ziyāda to sharāfat bhī burī hotī hai

ye zamāna baḌā nāzuk hai sambhal kar chaliye

jān-e-man itnī nazākat bhī burī hotī hai

ḳhuub shah detī hai ye aur gunah karne ko

kyā ḳhudā aap kī rahmat bhī burī hotī hai

dilbaroñ ko hai ye milne kā sunahrī mauqa.a

kaun kahtā hai qayāmat bhī burī hotī hai

pyaar kī suuī bhī chubhtī hai rafū karne meñ

chāk-e-dil kī to marammat bhī burī hotī hai

pursish-e-hāl ko aa.e haiñ vo ġham de ke mujhe

kaise kah deñ ki ayādat bhī burī hotī hai

konā haath aa.e to pallū ko pakaḌ lete haiñ log

thoḌī anjānī ijāzat bhī burī hotī hai

aañch aa.e jo usūloñ pe to saudā kaisā

yuuñ usūloñ kī tijārat bhī burī hotī hai

us ne 'sāhil' tumheñ dīvāna banā rakkhā hai

haa.e kambaḳht mohabbat bhī burī hotī hai

chori kaisi bhi ho ye lat bhi buri hoti hai

dil chura lene ki aadat bhi buri hoti hai

achchhi aadat ka nafa log uTha lete hain

had se ziyaada to sharafat bhi buri hoti hai

ye zamana baDa nazuk hai sambhal kar chaliye

jaan-e-man itni nazakat bhi buri hoti hai

KHub shah deti hai ye aur gunah karne ko

kya KHuda aap ki rahmat bhi buri hoti hai

dilbaron ko hai ye milne ka sunahri mauqa

kaun kahta hai qayamat bhi buri hoti hai

pyar ki sui bhi chubhti hai rafu karne mein

chaak-e-dil ki to marammat bhi buri hoti hai

pursish-e-haal ko aae hain wo gham de ke mujhe

kaise kah den ki ayaadat bhi buri hoti hai

kona hath aae to pallu ko pakaD lete hain log

thoDi anjaani ijazat bhi buri hoti hai

aanch aae jo usulon pe to sauda kaisa

yun usulon ki tijarat bhi buri hoti hai

us ne 'sahil' tumhein diwana bana rakkha hai

hae kambaKHt mohabbat bhi buri hoti hai