chup bhi ho bak raha hai kya waiz

chup bhī ho bak rahā hai kyā vaa.iz

maġhz rindoñ kā khā gayā vaa.iz

tere kahne se riñd jā.eñge

ye to hai ḳhāna-e-ḳhudā vaa.iz

allāh allāh ye kibr aur ye ġhurūr

kyā ḳhudā kā hai dūsrā vaa.iz

be-ḳhatā mai-kashoñ pe chashm-e-ġhazab

hashr hone de dekhnā vaa.iz

ham haiñ qaht-e-sharāb se bīmār

kis maraz kī hai tū davā vaa.iz

rah chukā mai-kade meñ saarī umr

kabhī mai-ḳhāne meñ bhī aa vaa.iz

hajv-e-mai kar rahā thā mimbar par

ham jo pahuñche to pī gayā vaa.iz

duḳht-e-raz ko burā mire aage

phir na kahnā kabhī sunā vaa.iz

aaj kartā huuñ vasf-e-mai maiñ 'amīr'

dekhūñ kahtā hai is meñ kyā vaa.iz

chup bhi ho bak raha hai kya waiz

maghz rindon ka kha gaya waiz

tere kahne se rind jaenge

ye to hai KHana-e-KHuda waiz

allah allah ye kibr aur ye ghurur

kya KHuda ka hai dusra waiz

be-KHata mai-kashon pe chashm-e-ghazab

hashr hone de dekhna waiz

hum hain qaht-e-sharab se bimar

kis maraz ki hai tu dawa waiz

rah chuka mai-kade mein sari umr

kabhi mai-KHane mein bhi aa waiz

hajw-e-mai kar raha tha mimbar par

hum jo pahunche to pi gaya waiz

duKHt-e-raz ko bura mere aage

phir na kahna kabhi suna waiz

aaj karta hun wasf-e-mai main 'amir'

dekhun kahta hai is mein kya waiz