chup-chap sah gae wo sitam bolte nahin

chup-chāp sah ga.e vo sitam bolte nahīñ

āñkheñ agarche ho ga.iiñ nam bolte nahīñ

sīdhā nishāñ lagāte haiñ dushman ke siine par

kahtā hai kaun un ke qalam bolte nahīñ

sargoshiyāñ guhar yahī karte haiñ siip meñ

majbūriyoñ ke saa.e meñ ham bolte nahīñ

hālāt āshkārā hoñ kaise zamāne meñ

ashkoñ ko pī ga.e haiñ alam bolte nahīñ

ik saath āsmāñ pe ye tūfāñ machā.eñge

mazlūmiyat kī aahoñ ke bam bolte nahīñ

apnā mizāj hai yahī shā.ir jo Thahre ham

ehsās kar rahe haiñ raqam bolte nahīñ

ḳhāmoshiyoñ ke saath vo manzil ko pā ga.e

jab jaate haiñ vo samt-e-adam bolte nahīñ

un ke tasavvufāt kī duniyā meñ dhuum hai

zāhir meñ garche ibn-e-adham bolte nahīñ

hai maslahat ḳhudā kī ki zāhir ye ho ga.e

ḳhud se tasarrufāt-e-karam bolte nahīñ

patthar pe chhoḌ jaate haiñ 'ainī' vo naqsh-e-pā

kahnā ġhalat hai un ke qadam bolte nahīñ

chup-chap sah gae wo sitam bolte nahin

aankhen agarche ho gain nam bolte nahin

sidha nishan lagate hain dushman ke sine par

kahta hai kaun un ke qalam bolte nahin

sargoshiyan guhar yahi karte hain sip mein

majburiyon ke sae mein hum bolte nahin

haalat aashkara hon kaise zamane mein

ashkon ko pi gae hain alam bolte nahin

ek sath aasman pe ye tufan machaenge

mazlumiyat ki aahon ke bam bolte nahin

apna mizaj hai yahi shair jo Thahre hum

ehsas kar rahe hain raqam bolte nahin

KHamoshiyon ke sath wo manzil ko pa gae

jab jate hain wo samt-e-adam bolte nahin

un ke tasawwufat ki duniya mein dhum hai

zahir mein garche ibn-e-adham bolte nahin

hai maslahat KHuda ki ki zahir ye ho gae

KHud se tasarrufat-e-karam bolte nahin

patthar pe chhoD jate hain 'aini' wo naqsh-e-pa

kahna ghalat hai un ke qadam bolte nahin