chup ka panchhi baiTh gaya tha peDon par

chup kā panchhī baiTh gayā thā peḌoñ par

kis ne merā naam likhā thā peḌoñ par

kyā jaane kyoñ panchhī sahme sahme the

pattoñ kā jab raqs bapā thā peḌoñ par

kal tak vīrāñ shāḳhoñ par ik raunaq thī

chiḌiyoñ kā ik Daar basā thā peḌoñ par

tez havā ne tinkā tinkā kar Daalā

ḳhvāboñ kā ik des basā thā peḌoñ par

ye bhī 'ābid' tez havā kī sāzish thī

ghoñsla koī TuuT gayā thā peḌoñ par

chup ka panchhi baiTh gaya tha peDon par

kis ne mera nam likha tha peDon par

kya jaane kyon panchhi sahme sahme the

patton ka jab raqs bapa tha peDon par

kal tak viran shaKHon par ek raunaq thi

chiDiyon ka ek Dar basa tha peDon par

tez hawa ne tinka tinka kar Dala

KHwabon ka ek des basa tha peDon par

ye bhi 'abid' tez hawa ki sazish thi

ghonsla koi TuT gaya tha peDon par