chup ke aalam mein wo taswir si surat uski

chup ke 'ālam meñ vo tasvīr sī sūrat us kī

boltī hai to badal jaatī hai rañgat us kī

sīḌhiyāñ chaḌhte achānak vo milī thī mujh ko

us kī āvāz meñ maujūd thī hairat us kī

haath chhū luuñ to laraz jaatī hai patte kī tarah

vahī nā-karda-gunāhī pe nadāmat us kī

kisī Thahrī huī sā'at kī tarah mohr-ba-lab

mujh se dekhī nahīñ jaatī ye aziyyat us kī

aañkh rakhte ho to us aañkh kī tahrīr paḌho

muñh se iqrār na karnā to hai 'ādat us kī

ḳhud vo āġhosh-e-kushāda hai jazīre kī tarah

phaile dariyāoñ kī mānind mohabbat us kī

raushnī ruuh kī aatī hai magar chhan chhan kar

sust-rau abr kā TukḌā hai tabī'at us kī

hai abhī lams kā ehsās mire hoñToñ par

sabt phailī huī huī bāhoñ pe harārat us kī

vo agar jā bhī chukī hai to na āñkheñ kholo

abhī mahsūs kiye jaao rifāqat us kī

dil dhaḌaktā hai to vo aañkh bulātī hai mujhe

saañs aatī hai to miltī hai bashārat us kī

vo kabhī aañkh bhī jhapke to laraz jaatā huuñ

mujh ko us se bhī ziyāda hai zarūrat us kī

vo kahīñ jaan na le ret kā Tiila huuñ maiñ

mere kāñdhoñ pe hai tā'mīr imārat us kī

be-talab jiinā bhī 'shahzād' talab hai us kī

zinda rahne kī tamannā bhī sharārat us kī

chup ke 'alam mein wo taswir si surat us ki

bolti hai to badal jati hai rangat us ki

siDhiyan chaDhte achanak wo mili thi mujh ko

us ki aawaz mein maujud thi hairat us ki

hath chhu lun to laraz jati hai patte ki tarah

wahi na-karda-gunahi pe nadamat us ki

kisi Thahri hui sa'at ki tarah mohr-ba-lab

mujh se dekhi nahin jati ye aziyyat us ki

aankh rakhte ho to us aankh ki tahrir paDho

munh se iqrar na karna to hai 'adat us ki

KHud wo aaghosh-e-kushada hai jazire ki tarah

phaile dariyaon ki manind mohabbat us ki

raushni ruh ki aati hai magar chhan chhan kar

sust-rau abr ka TukDa hai tabi'at us ki

hai abhi lams ka ehsas mere honTon par

sabt phaili hui hui bahon pe hararat us ki

wo agar ja bhi chuki hai to na aankhen kholo

abhi mahsus kiye jao rifaqat us ki

dil dhaDakta hai to wo aankh bulati hai mujhe

sans aati hai to milti hai bashaarat us ki

wo kabhi aankh bhi jhapke to laraz jata hun

mujh ko us se bhi ziyaada hai zarurat us ki

wo kahin jaan na le ret ka Tila hun main

mere kandhon pe hai ta'mir imarat us ki

be-talab jina bhi 'shahzad' talab hai us ki

zinda rahne ki tamanna bhi shararat us ki