chup rahoge to zamana is se bad-tar aaega

chup rahoge to zamāna is se bad-tar aa.egā

aane vaalā din liye hāthoñ meñ ḳhanjar aa.egā

vo lahū pī kar baḌe andāz se kahtā hai ye

ġham kā har tūfān us ke ghar ke bāhar aa.egā

kyā tamāshā hai Dare sahme hue haiñ saare log

kyā mirī bastī meñ koī zālim afsar aa.egā

lauT kar pīchhe kabhī jaatī nahīñ raftār-e-vaqt

zindagī ko ab miTāne kaun ḳhud-sar aa.egā

maiñ huuñ us bazm-e-hasīñ kā muddatoñ se muntazir

sab ke hāthoñ meñ jahāñ labrez sāġhar aa.egā

tum isī vaadī meñ Thahro intizār us kā karo

vo tumhāre paas ik paiġhām le kar aa.egā

kūcha kūcha se uThegī ġham-zadoñ kī ek lahr

qarya qarya se bahī-ḳhvāhoñ kā lashkar aa.egā

haath meñ mish.al liye har samt pahre par raho

raat kī chādar lapeTe hamla-āvar aa.egā

dekh ai sayyāh mere des kī ujḌī bahār

is se baḌh kar bhī koī ġhamgīn manzar aa.egā

merī surḳhī-e-tasavvur se haiñ kyuuñ nārāz aap

kyā harā peḌ aap tak bhī phuul le kar aa.egā

Dhal chalī 'daurāñ' javānī kī chamaktī dopahar

ab bhalā pahlū meñ mere kaun dilbar aa.egā

chup rahoge to zamana is se bad-tar aaega

aane wala din liye hathon mein KHanjar aaega

wo lahu pi kar baDe andaz se kahta hai ye

gham ka har tufan us ke ghar ke bahar aaega

kya tamasha hai Dare sahme hue hain sare log

kya meri basti mein koi zalim afsar aaega

lauT kar pichhe kabhi jati nahin raftar-e-waqt

zindagi ko ab miTane kaun KHud-sar aaega

main hun us bazm-e-hasin ka muddaton se muntazir

sab ke hathon mein jahan labrez saghar aaega

tum isi wadi mein Thahro intizar us ka karo

wo tumhaare pas ek paigham le kar aaega

kucha kucha se uThegi gham-zadon ki ek lahr

qarya qarya se bahi-KHwahon ka lashkar aaega

hath mein mishal liye har samt pahre par raho

raat ki chadar lapeTe hamla-awar aaega

dekh ai sayyah mere des ki ujDi bahaar

is se baDh kar bhi koi ghamgin manzar aaega

meri surKHi-e-tasawwur se hain kyun naraaz aap

kya hara peD aap tak bhi phul le kar aaega

Dhal chali 'dauran' jawani ki chamakti dopahar

ab bhala pahlu mein mere kaun dilbar aaega