chupke se dimagh mein dar aae

chupke se dimāġh meñ dar aa.e

yādoñ ke safīr bin bulā.e

kab tak dukh kā dhuāñ dhuāñ sā

kab tak ġham ke muhīb saa.e

bahrūpiyo ruup kī duhā.ī

taskīn-e-nazar ko koī aa.e

baiThe haiñ qadam qadam pe naqqād

tā.īd kī mish.aleñ jalā.e

dāmān-e-ḳhirad ne ye havā dī

jitne the charāġh sab bujhā.e

āñkhoñ se nikal gayā añdherā

taare se palak pe jagmagā.e

gulshan gulshan khañgāl Daalā

ḳhushbū ḳhushbū pukār aa.e

is koh-e-ḳhirad ko maiñ karūñ kyā

dīvāne se kab uThāyā jaa.e

huuñ bū-e-gul ḳhizāñ-gazīda

koī jise DhūñDe bhī na paa.e

pat-jhaḌ ko rahnumā banā kar

kaliyoñ ne ajiib gul khilā.e

darbār-e-suḳhan-varāñ meñ tanhā

baiThā hai razā bhī sar jhukā.e

chupke se dimagh mein dar aae

yaadon ke safir bin bulae

kab tak dukh ka dhuan dhuan sa

kab tak gham ke muhib sae

bahrupiyo rup ki duhai

taskin-e-nazar ko koi aae

baiThe hain qadam qadam pe naqqad

taid ki mishalen jalae

daman-e-KHirad ne ye hawa di

jitne the charagh sab bujhae

aankhon se nikal gaya andhera

tare se palak pe jagmagae

gulshan gulshan khangal Dala

KHushbu KHushbu pukar aae

is koh-e-KHirad ko main karun kya

diwane se kab uThaya jae

hun bu-e-gul KHizan-gazida

koi jise DhunDe bhi na pae

pat-jhaD ko rahnuma bana kar

kaliyon ne ajib gul khilae

darbar-e-suKHan-waran mein tanha

baiTha hai raza bhi sar jhukae