daere par hi kahin hun koi manqut-e-wajud

dā.ere par hī kahīñ huuñ koī manqūt-e-vajūd

gumbad-e-nīlī kā maiñ nuqta-e-parkār nahīñ

maiñ zamīñ par to muqayyad huuñ magar dam meñ hai dam

āsmāñ bhī to makāñ hai pa havā-dār nahīñ

ab tire baad kise dekhūñ koī hai to batā

ab koī zulf-e-tarah-dār tarah-dār nahīñ

varna sahrā se baḌā shahr na hotā koī

fitrat-e-reg meñ afrāzī-e-dīvār nahīñ

maiñ tire husn kī qīmat to lagāne se rahā

ye mirā dil hai koī misr kā bāzār nahīñ

āsmāñ par hai zamīñ arsh kī mānind muqīm

aur us arsh pe juz ahmad-e-muḳhtār nahīñ

us ke aane se kahīñ duur chale jaate haiñ

sach kahūñ chāñd se tāroñ ko zarā pyaar nahīñ

sunnat-e-hijrat-e-yasrab pe bhī chaltā lekin

ġhaar har raah meñ maujūd hai par yaar nahīñ

daere par hi kahin hun koi manqut-e-wajud

gumbad-e-nili ka main nuqta-e-parkar nahin

main zamin par to muqayyad hun magar dam mein hai dam

aasman bhi to makan hai pa hawa-dar nahin

ab tere baad kise dekhun koi hai to bata

ab koi zulf-e-tarah-dar tarah-dar nahin

warna sahra se baDa shahr na hota koi

fitrat-e-reg mein afraazi-e-diwar nahin

main tere husn ki qimat to lagane se raha

ye mera dil hai koi misr ka bazar nahin

aasman par hai zamin arsh ki manind muqim

aur us arsh pe juz ahmad-e-muKHtar nahin

us ke aane se kahin dur chale jate hain

sach kahun chand se taron ko zara pyar nahin

sunnat-e-hijrat-e-yasrab pe bhi chalta lekin

ghaar har rah mein maujud hai par yar nahin