dagh-e-furqat visal ki baaten

dāġh-e-furqat visāl kī bāteñ

chhoḌ ḳhvāb-o-ḳhayāl kī bāteñ

zindagī kyā hai ik qayāmat hai

dard aaheñ malāl kī bāteñ

kashf vāloñ ko ham batāte haiñ

mo.ajizāt-e-jamāl kī bāteñ

fikr ham ko kamāl-e-fan kī hai

vo sunā.eñ zavāl kī bāteñ

mere afsānoñ meñ to bikhrī haiñ

gardish-e-māh-o-sāl kī bāteñ

zikr-e-māzī azaab jaisā hai

us se bad-tar ye haal kī bāteñ

chāñd jaltā hai jab bhī hotī haiñ

tere husn-o-kamāl kī bāteñ

aao 'dānish' se aaj sunte haiñ

ulfat-e-lā-zavāl kī bāteñ

dagh-e-furqat visal ki baaten

chhoD KHwab-o-KHayal ki baaten

zindagi kya hai ek qayamat hai

dard aahen malal ki baaten

kashf walon ko hum batate hain

moajizat-e-jamal ki baaten

fikr hum ko kamal-e-fan ki hai

wo sunaen zawal ki baaten

mere afsanon mein to bikhri hain

gardish-e-mah-o-sal ki baaten

zikr-e-mazi azab jaisa hai

us se bad-tar ye haal ki baaten

chand jalta hai jab bhi hoti hain

tere husn-o-kamal ki baaten

aao 'danish' se aaj sunte hain

ulfat-e-la-zawal ki baaten