dagh jalta hai mere sine mein

daaġh jaltā hai mire siine meñ

dil pighaltā hai mire siine meñ

shīsha-o-sang muqābil aa.e

kuchh chaTaḳhtā hai mire siine meñ

raat bhar rāz-e-ḳhirad sirrr-e-junūñ

dil ugaltā hai mire siine meñ

terā ḳhat hai ki qalam hai merā

kuchh to jaltā hai mire siine meñ

is liye dasht se mānūs huuñ maiñ

shahr bastā hai mire siine meñ

bāñTte rahte haiñ vo la.al-o-gohar

ghan barastā hai mire siine meñ

chūḌiyāñ khankī haiñ phir raat ga.e

husn sajtā hai mire siine meñ

phir ḳhizāñ meñ khilā bāġhī ġhuncha

dil laraztā hai mire siine meñ

ism-e-sāqī vahī ism-e-āzam

kaun japtā hai mire siine meñ

dil mirā qurrat-o-mansūr kā naam

le ke chaltā hai mire siine meñ

be-ḳhudī aur ḳhudī kā taagā

jā ulajhtā hai mire siine meñ

baada 'suqrāt' vahāñ piitā hai

dam nikaltā hai mire siine meñ

baada 'suqrāt' se 'tal.at' ko milā

sach panaptā hai mire siine meñ

dagh jalta hai mere sine mein

dil pighalta hai mere sine mein

shisha-o-sang muqabil aae

kuchh chaTaKHta hai mere sine mein

raat bhar raaz-e-KHirad sirrr-e-junun

dil ugalta hai mere sine mein

tera KHat hai ki qalam hai mera

kuchh to jalta hai mere sine mein

is liye dasht se manus hun main

shahr basta hai mere sine mein

banTte rahte hain wo lal-o-gohar

ghan barasta hai mere sine mein

chuDiyan khanki hain phir raat gae

husn sajta hai mere sine mein

phir KHizan mein khila baghi ghuncha

dil larazta hai mere sine mein

ism-e-saqi wahi ism-e-azam

kaun japta hai mere sine mein

dil mera qurrat-o-mansur ka nam

le ke chalta hai mere sine mein

be-KHudi aur KHudi ka taga

ja ulajhta hai mere sine mein

baada 'suqraat' wahan pita hai

dam nikalta hai mere sine mein

baada 'suqraat' se 'talat' ko mila

sach panapta hai mere sine mein