daman-e-arzu ke kinare sameTte

dāmān-e-ārzū ke kināre sameTte

miltā hai kab kisī ko vo sab kuchh jo chāhiye

hote haiñ kuchh sharar bhī chhupe raakh meñ kahīñ

hai dekhne meñ sard sambhal kar kurediye

sab raushnī ke phuul to khilte hī bujh ga.e

kaḌvā dhuāñ ab āñkhoñ se ro ro nikāliye

mushkil-pasand apnī tabī.at hai kyā kareñ

chun chun ke ḳhaar rāhoñ meñ ḳhud ham ne dhar diye

miltā hai sard-rūī se mah tund-ḳhū hai mehr

apne liye kiran koī ab kis se māñgiye

hasrat se sū-e-dar ye take jaanā tā bike

an-thak ke chor āñkhoñ ko ab sone dījiye

qindīl meñ shagūfoñ ke jalne lagī havā

raushan haiñ shāḳh shāḳh pe ḳhushbū bhare diye

haañ mil liye the us se kahīñ ittifāq se

duniyā ne kaise kaise fasāne banā liye

'bilqīs' liije hosh ke nāḳhun bahut huā

jazbāt ko shu.ūr kī had de ke rokiye

daman-e-arzu ke kinare sameTte

milta hai kab kisi ko wo sab kuchh jo chahiye

hote hain kuchh sharar bhi chhupe rakh mein kahin

hai dekhne mein sard sambhal kar kurediye

sab raushni ke phul to khilte hi bujh gae

kaDwa dhuan ab aankhon se ro ro nikaliye

mushkil-pasand apni tabiat hai kya karen

chun chun ke KHar rahon mein KHud hum ne dhar diye

milta hai sard-rui se mah tund-KHu hai mehr

apne liye kiran koi ab kis se mangiye

hasrat se su-e-dar ye take jaana ta bike

an-thak ke chor aankhon ko ab sone dijiye

qindil mein shagufon ke jalne lagi hawa

raushan hain shaKH shaKH pe KHushbu bhare diye

han mil liye the us se kahin ittifaq se

duniya ne kaise kaise fasane bana liye

'bilqis' lije hosh ke naKHun bahut hua

jazbaat ko shuur ki had de ke rokiye